نصوّرك...
بلّي عندي نصورك
نصوّرك...
كيما نحبّ نشوفك
نصوّرك
تهرب ... تقرب
نمسّك... نحسّك
ندوّرك ونصوّرك
نخلّط الاسمر من لونك
وسط عيونك
نخلق ورقة
وبصوابع ايديك..
نصوّرك
خاطرك تعجيني في كلّ وقت
ومحلاك كي تتكلّم
ونتوحشك ساكتة تخمّم
حبّيت نلمّدهم حالاتك
كلامك وسكاتك
وفيهم... نصوّرك
نعمل من عينيك لباس يغطّيك
من راسك لساقيك
ما يكشف منّك... كان عينيك
وعليك... نصوّرك
نزيدك يدّ ... تحمّلني
وزوز كي تتكلّم تفهّمني
والرابعة تشقّ بيّا الطريق
وتبّعد عليّا الفرش... نفيق
ونصوّرك
نصّور ضحكتك المغشّشة
تبسيمتك المهمشة
شفّتك كي تهبط ... تضحّكني
قبل ما نرضّيك..
ونصوّرك
نزيدك بستخالة في راسك
وسط شعرك...
نراها كي تاقف... ونحمّلك
تتغمّض عينيَّ بيك
ونصّورك
عالموزيكة نصوّرك أوتار
مالحسرة نصوّرك تذكار
في غدوة أفار
في الورقة والقلم
في الموجود والعدم
قدّامي وفي نفس كلامي
فاضل من أيامي
نتبسّم ... ونصوّرك
ونصوّر منّك انتي ..
وانتي.. وانتي
ونخلّيك تختار
اختارلي وحدة لوحدتي
ووحدة تبنيني في هدّتي
وحدة للمراية
وحدة نفهمها
وحدة تحميني
وحدة نحلمها
وحدة في ثنيتي
وحدة في بيتي
ووحدة ووحدة ووحدة...
واقعد انتي ... كيما انتي
في كلّ وحدة نلاقيك
نتبّع عليك ...
ونصوّرك