كتبت ليك كلام ميتقالش وحروف متتحلش فيها العين .. ستنيتك توا سنين .. ونصبر في روحي بقلم و ورقة ... ينشف الحبر نكتبلك بدموعي ..وكي توفى الورقة نكمل نوشم على بدني إلي ما يتقالش م الكلام .. وكلام ما يتقالش خاطرو يتحس ويتعاش ..كلام موش كيف الكلام ... كلام يوجع وكي تحب تقسموا معايا عمرو ما يتوزع... ناس قبل قالوا كلنا في الهم خوات أما لا يا حبيبي كلها تقعد خرافات وحكايات ... ناس قبل ما كانوش يراو الدنيا مغيمة مل دموع إلي تملى العين كي ترى الناس واحلة ولا رب ولا عبد يخلص ... ناس قبل كانوا يقسموا الكسرة ولا حد يبات بلاش عشا ... لا اليتيمة ولا المطلقة ولا إلي رجلها خش الخلا ... هاذم ناس قبل إما توا إلي معندوش يشنق روحو بحبل.. الموت أهون وأستر ولا حد يعاير ولا ناس تنبر ... ستنيتك بش نحكيلك ومن هم الدنيا نشكيلك ... أما .. ها الكلمة ديما في حلقي كيف الشوكة .. تنغص الفرحة كل ما نضحك .. تفكرني في ناس غيري ملقاوش ها السرقة .. سرقة الضحكة من الدنيا وهي عاطيتنا بالقفا ... الناس إلي حبيت نحكيلك عليهم ... ونشكيلك اش عاملة ها الدنيا الكلبة فيهم .. ناس إلي تصبر في روحها على دنيتها بآخرتها... إلي عينوا تدمع شفايفو تتكلم ويقول مل وجيعة نتعلم إلي عند ربي خير .. الطفل الصغير إلي كتفو طاح وساقيه حفاة وتدمرت بش يحصل حرفين بعد ما دخل المكتب وهو فايت الستة سنين .. يقروه عامين وكي يسال علاش يسكتوه ويقولوا وين بش تهزك القراية وين ؟؟؟ بش تحلك ثنية في البحر ؟؟ عندهم الحق وهو إلي كل صيف يتقلى على الجمر والعمر هرب منو وهو يحب يحصل كلمتين ... كلمتين يرى فيهم الجنة ؟؟؟ يحب كي يسألو حد يعرف يجاوب ويكتب هو شكون ومنين ... المرا إلي تتوجع في الليل وهي تتقلب على فراش ع الأرض هي مازالت ماحلمتش بفرش بو بلاصتين تعانق فيه رويجلها وتدحنس عليه وهو يسالها ها زين منين ... النسا إلي نكتبلك عليهم ما يعرفوا م الراحة كان غمضة العين إلي يطلبوا ربي ما يخطفهاش "بوتليس" الواقع والفقر والحاجة والتعب والجبانة... النسا إلي نكتبلك عليهم نساو انهم نسا ودلالهم وزينتهم كلاتهم المسحة والمنجل وساعات المطرقة ... النسا إلي نحكيلك عليهم ونشكيلك اش عاملة الدنيا فيهم تمشي الفجر وتروح شطر الليل .. تنحي جبة الراجل وتلبس روبة الكوجينة تصنف بيدين مجروحة ظهر محني ولازمها الماكلة بنينة ..ماكانش تتعدلها ليلة مشومة وإلا تقعد فرجة في الحومة ... الناس إلي نحكيلك عليهم فيهم إلي لا يعرف يكتب لا يقرا ولا حتى يحلم ... فيهم إلي حلمتو يتفرج في كوميك بالألوان ... ملو حياتهم إلي مصبوغة بالأسود والأبيض .. حياة اليل والنهار إلي مليانة بالغصة والوجيعة ... ولا عين تدمع لا فم يتكلم خاطر كلو أمر ربي ... إلي يهربوا منو في نهار يخلط عليهم حتى في الليل ... أحلامهم على قد خطاويهم إلي ما عرفتش ثنية البرا م الدوار ... ستنيتك بش نحكيلك عليهم وكي جيت ما فهمتش كلامي .. وحتى كي بكيت ولمتك ما قدرتش ملامي ... سألتني بضحكة صفرة : يخي ثمة هكا بالحق ؟؟؟ إي ثمة !!! أما إلي كيفك ما يتلفتوش لا وراهم ولا على جنابهم بش يراو إلي جابتهم الدنيا على برا ... إلي نساتهم العدالة الإلهية كي تزادوا تكتبوا في أخر قائمة الشعبة وكي هبت رياح التغيير طاحوا في هفهوف النسيان وما يتفكروهم كان بكردونة والبطانية ... ثمة أما إلي كيفك أحلامهم عاميتهم و أنوار الشوارع في الدنيا منسيتهوم ...ما عندهمش ليل لا في دنيتهم لا في عينيهم... إلي يطلبوا يلقاه وبقرايتو شق ثنية في البحر ومشى وخلا إلي كيفو يتقلى ع الجمر وحتى كي حكيتلو مشى غادي نساهم ... هوما ليهم مولاهم أما أنتم ليكم ملاكم والي خلفوه في الأرض والي عمللهم جنة لوطا وجنة الفوق .. عايشين الدنيا بالطول والعرض وكي يحب يتبدل شوية يتلفت ع اليمين ويقول مساكين خانتهم الدنيا ... نساكم ما يحسوش بنساهم وصغاركم ما يعرفوش صغارهم .. صغارهم إلي يكبروا في الحرام المكبوس على الظهر والي يكبروا قبل وقتهم م الهم والضرب .. الدنيا تضرب والمعلم يضرب والأم والبو كي يتفكروا هم الزمان يضربوا .. نساكم تحمر وتدبغ أما نساهم تحفر وتردم ... كل واحد وجنتو كل واحد ودنيتو .. أما ثمة إلي عايش وثمة إلي ميت بالحيا وموجودين بش إلي عايشين يقيسوا بيهم الدنيا والصبر. وساعات هوكا يلقى علاش يتصدق ولا ينبر .. نشف الحبر وإنت ماكش هنا وكي كملت حكيتلك نلقى كلامي موشم على يديهم ووجوهم وحتى قلوبهم .. إنت ما ريتش أما انا حسيت بقلمي وهو ينبش فيهم ويفكرهم في إلي دافنينو تحت خطاويهم... دموعي نزلت ملح مع عرقهم على حلمة بنية صغيرة تحب تشبه لبياض الثلج إلي شافتها ما غير ألوان وكل ليلة كي تحلم بيها تنسى ألوانها في الليلة إلي تعدات ...