حب .. وجيعة ..غصة ... قهر يقتلك كل شوية ...تتفكر حاجات وتنسى أكثرها .. تتفكر سنين غاب فيها وتنسى إلي كان فيها موجود ..لا لا .. انا ما نسيتش ..هو كان ما ثماش ... خلاني سنيني الكل وحدي .. نتفكرش اني قتلو نحبك ولا سمعتها منو ... نحبك !!!!نكرها ها الكلمة على قد ما نحبها .. نسمعها من مئات الأفام ..تدخل قلبي كيف السكين .. تقطع فيه وتريش ... تريش حروف اسمو إلي عديت عمري نلمد فيها .. تقطع هاك التصويرة إلي صورتها بدموعي وقلت لا ميسالش لازمها تكون موجودة حتى عل عين .. بالك تعاوني ع الوحدة ....نسمعها ها الكلمة ...نعمل روحي صدقتها ..لكن قلبي يكذب أي حد ينطقها غيرو ... اش نعمل لعمري ؟؟ عديتو نستنى فيها منك.. وإنت بخلت ... قولها وحررني من ها الحفرة الظلمة إلي طحت فيها وإنا نلعب صغيرة .. كنت صغيرة كي سمعتها .. تقالت لغيري ..عجبوني حروفها .. في الوذن رنانة كي تتقال بالشوية .. تدخل وتسكن في القلب كي يتهمس بيها .. كنت صغيرة عجبتني ومكانش عندي حتى لعبة نلهي روحي بيها ... حبيتها وبقيت نعاود فيها قدام المرايا ..حلوة أما بقي ثمة حاجة ناقصة ... ثمة صوت تنهيدة منغصها عليا .. بقات ترن في وذني كيما سمعتها ..دافية وحنينة .. صافية معاها تبسيمة وبوسة ع الخد ويد تلعب بالشعر ....عاودتها .. قلتها . كتبتها ألف مرة كاينها خطية .. حبيت نحفظها بش ننساها ونتعرى منها..حبيت نتعلم كيفاش نكتبها بخط مزيان ومستوي ونتعلم ننطق حروفها بالصحيح حرف ورا حرف .. حبيت نشربها ونتعبا بها .. حبيتها تخرج من فمي رنانة كيما سمعتها .. حبيت نتعود بيها حتى نسمعها منك .. ستنيت نهار وثنين .. عام ورا عام وتوا تعداو سنين .. مازلت ناقف قدام المرايا ونعاودها كايني صغيرة .. ناقصة المانديلا وظفيرة شعري إلي قصيتو برشة مرات وإنا نستنى .. ماتبدل فيا شي ..حتى ملامحي هي هي .. والله أنا كيما إنا ..ناقف فرد مكان ونقولها بالحرف بالحرف ونستنى نسمع حروفها مغير تنهيدتي إلي ولات قدي... ستنيت وما سمعتش ... كبرت وما حسيتش .. بقيت نلوج عليها ...من فم ل فم .. نحب نسمعها رنانة كيما وإنا صغيرة .. سمعت وسمعت وسمعت لكن قلبي ما صدقش ... بالي ما رتاحش ... ناري ما بردتش ... تعلمت ناقف قدام المرايا نتخيلك تقول فيها .. الصورة متركبش معايا .. نتمنى نشق صدري وإلا نكسر المرايا .. أما الدمعة تسبقني .. نهرب للظلمة نخبي راسي تحت الوسادة .. بالك تحن وتجيني في المنام ونسمعها ...أما وينك ؟؟ ما كنتش !!!وكبرت ناقصتها .. نلوج عليها كيما هي .. ما لقيتهاش... وإنت موجود .. نراك ديمة.. نخزرلك ونتوسلك بخزرة مسروقة وتنهيده مخنوقة .. قولها وخرجني من قبري .. تهرب وتسكت ... ونبلع انا السكينة بدمها وقلبي يمشي طروف طروف .. وتتقطع تصويرة الحلمة ...ونبكي بدموع تغسلني وإنا ميتة حية ونعاود نتدفن في قبر حفرتو بيدي وتمديت فيه صغيرة حبيت نلعب وإنا صغيرة ومعنديش لا وين نتخبى لا بشنوة نلعب ... عشت نحلم بكلمة رنانة ... نلوج عليها في كل شي في موزيكا .. في شطحة .. في تصويرة .. في خزرة .. ملقيتهاش .. نسمع فيها برشة أما قلبي مازال في قبرو .. صغير ومصدق الحلمة .. يستنى فيها توا سنين ومش مئيس ..مازال يعاود ويكتب .. والورقة تملات تسودت وتلودت وفى ..الحبار وفات دموعي ودمي ولتوا مازال مش مئيس .. مسكين صغير وما يعرفش إلي الحلمة تبقى حلمة ... يا ريتو ينساها ويرحمني والا يأيس ويرتحني ...