من كرطاج لباب بحر تنظم موكب عظيم..صحيح مافماش لا كرنيطة ولا موزيكا ،أما العصافر في باب بحر اليوم أكثر من العادة وريحة الياسمين كل مرة تفوح على غرادة ،المراكب مرسية في حلق الواد ما سرحتش اليوم ..تي حتى من ورد أريانة !خلا جناينو وجا باش يحضر و السناجق هجرت مقامات الصالحين وتزرعت على أطراف المدينة ترفرف..
المدينة خالية وهو واقف في الساحة وحدو .العينين تفركس و الفكر مشغشب ..الراجل دارها شليلة ومليلة و مالقاش الي في خاطرو! غفا وقال "زعمة النار تطفاشي ونبرى من وجعاتي"..
وعلى حلة عينو ،يشوف خيال جاي من راس الزنقة..جاية تتمشى مرا زمنية حاشمة ما أزينها ما أقوى حضورها وما أحد غزرة عينها. ال"مقياس يعجب" و "غثيث طايح مهدود" السحر مبدع هواوي وفوق الحنة خلخال ويا أم السفساري"طاح تخبل هزي حزامك"..
كي قربتلو وشافها،قال "ياسعفايا" "أودعوني يا البنات بالله" ! قاللها الي سماك غناك وأنا سميتك "للا البية" شفتك مرة متعدية ذهبتلي الشيرة ومن نهارتها عليك قعدت "نغني يا مشكايا" ريتك ونعرف وين! "زمان الي كانت خصة في ربط الحلفاوين" ومن وقتها حبست الوقت في ليلة من ليالي تمام القمر .التاريخ حسبتو برموش عينيك .ومن لحظتها وأنا نعنق في الشوارع والقبب والياسمين و القرنفل و العطرشية ..نعنق مالوف قديم موشح و مدحية ..نعنق الصوامع الي تشعل في كل مغرب من رمضان المدينة المحمية .ووقتها..فهمت حقيقة التواريخ ،ياخي عنقت اسمي واسم البلاد وسميتك "تونس" ! وعنقتو..اسمك واستباركت بيه
جاوبتو للات العين و "يلي عيونك في السما" وقالتلو يا فلان ماحكاولكش علي ما رضختش وبحكمتها غلبت سلاطين وملوك وما هابتش وعمرت بلاد كي غرست زيتونة ؟! أنا ولدتني عليسة ورباتني للا المنوبية وغطاوني كرامات أم الزين الجمالية وخواتي زينة بنت الهنشير و صليحة و الزهرة فايزة وقبلك أنت "بعثولي ألفين رسالة وقالوا زيني عامل حالة"
قاللها مازلت في نفس الريشة و العنتزية الي شفتك بيها الخطرة الأولانية..مواتيتك الحقرة وتتليف الجرة والروبة السنجقية الحمراء خضراء و غنالها "ياحبيبي طولت الغيبة زاد ليعاتي " و "هذا يوم سعيد جاني خلي " والي تعدى و فات قبلك مانحبوشي يرجع . قاللها ظاهرة بنت أصول وتفهم بالكار وآش معناه. وأنا راني ولد ناس كبارات ..عزيزي في زمانو كان بحار يسرح بمراكبو يجيب الخيرات علمني كيفاش مانخليش الليل بلاش قمرة كيفاش نصون الجوهرة في عميق البحر. نهار و أنا سارح بسفينتي في ليلة صيفية ..لاهي في روحي وما عليا..في لحظة تملات السما بالنجوم وتملا قلبي بالمحبة وريت وجهك في السما مكتوبة تفاصيلو و همت في ملامحو وليلتها تكتبت المحبة و تملات بالماء المواجل كي صبت الشتا و جات غسالة النوادر .الخير دز أما القمرة ما طفاتش..
يا للات العين كان محبتي ماتكفيكش عندي من المال الخير الكثير وليك انت "نعطي مالي والي يهون عليا" ..قالتلو "خلي المال لغيري مانحبش فضة وذهب" بابا أصلو فلاح كبير وترعرعت في خير الخيرين و سوانينا في "دخلة المعاوين" و "زيتوننا في جرجيس قالو صابة" قاللها عليك نلوج "قدك يسحر يا مسمية". قالتلو بحار كيفك لازمو يعشق في حورية الشعر ذهبي و العين زرقا سماوية و أنا يا ولد الناس سمرا و شعري أكحل ليلي ما نرضيكش..قاللها "اللطف ما أقوى سرك وكا أحر غزرة عينك" صحيح " لاموني الي غارو مني مني و قالولي آش عجبك فيها" أما الي يعرف عزو كلام الناس مايهزو ..قالو "سمرا يا سمرا" قلتلهم "طيعوا الأسمر ماطاعت العربان زميم العسكر " هكا قالت نانا كي غنات و قلي كي سبتك يا للات العين تايهة في زناقي المدينة ؟
بنت الناس حركها الكلام الزين والكلام الزين يتدفع في الدين والراجل يظهر عليه ولد أعيان و البلدي بلدي لو كان زيتو دردي. هو اسم الله عليه "اميل الكشطة و معنقر الكبوس و البنات-راهي- عليه حبوس" الزين تبارك الله يوسفي والكسوة عاطية بالوهرة ..ضحكت بانو سنيها..قالتلو
لبست ها الروبة السنجقية و قديت حنة زمنية اللبسة قالو خرجت عليا لكن لبستي ناقصها "خلال " والخلالات في بلادي بالبرشتة على شكون نرضى .أما أنا حابة على خلال غير و موش كي الأخرين . وكيف مالقيتش الي في خاطري ،نعتوني على حوانت المدينة .قالولي على صايغي عظيم وبين يديه تطاوع الجواهر و عامل خلال لا شافت العين ولا رات ..تحفة زمنية صنعتها يديه ونسى صنعتو من باعد.
قاللها "تبعني نبنيو الدنيا زينة " ونفهمك الداقزة شنية . تبسمت الصبية و تفتحت الاسرار المخبية .الراجل من فرحتو نظملها "قوالة" و قال الي يعطي سلاحو يموت بيه و أنا قلبي كي عطيتهولك حييتني بيه ! أما إذا خصيمك القاضي اش تعمل يا مغبون ..و "شرع الحب بيني و بينك الي تحكم نرضى بيه" نحبك! وعندي خلالك .هايم في حريرك و حروجاتك و أزرارك و"بخنوق بنت المحاميد عيشة " نحبك و نحب سواكك و لوبانك المعصم بلار و "عامين مايكملوش النقيشة " نحبك بقصديرك و نحاسك و الذهب يرق يرق وما يتقطعش. أنت الغناية و انت القصيدة و سر النوتة ومن العود العربي نخرجلك الهنك والحسين والعرضاوي و الاصبعين و المحير سيكاه مااحلى عينيك كي تخزرلي ينسى خالك ماقاساه !
قالتلو اتبعني وإلا نتبعك مايهمش أنا معاك مانفدش .المحبة الي في عينك تبان تنسيني الزمان و المكان. امشي و شوف المدينة كيفاش فرحانة بينا معرضتلنا بالهلالو وتبارك في العشقة الجديدة وصوت المالوف يواجب من غادي "يا نهار البارح ياليل اليوم خلاتني فارح عاشق مغروم " يواجب صوت المالوف مابنو .معاك مانفدش حبيتك خاطرك غير خاطرك موش كي الأخرين ..صحيح أنا مقدية ونحب الرتبة لكن أنا نفد ملي مسطر والي مسنتر والكلام الي قبل ما يتقال يتصنصر والي مفصل والقالب الي قبل حين وبين محضر والضحكة قد قد والدغري والرسمي وكلمة عيب و مايليقش ومايصيرش ..!! نحبك خاطرك موش كيفهم و "من دنيتهم فكنا يزينا " و "إذا ما ترضاشي باش نحياها ها العيشة الي القلب يتمناها " خليني ساكتة مانكملش الباقي ..هيا اخزر غادي ! تشوف فيها هاذيكا ؟ هاذيكا روحنا في "قهوة العلي " لالا هانا في الشواشين تي شبينا قدام جامع الزيتونة ؟؟ خزرتلو وقالتلو نحبك يا سيد الرجال يا حكاية بلدية يا حربي كي "فارس بغداد" قاللها فرحان ونعد في فرحتي بدقات قلبي و خصلات شعرك ياطلسم جميل "يا صندوق عجب"
قاتلو محلاك فيانة و ضخامة قالها ماغلاك هبال و رزانة قبل ما نلقاك "اخترعتك في خيالي " و قعدت بيك نعيش انت الي "صورتك أحلى بسمة و رسمتك على شباكي نسمة نستناك ليالي " وهاك جيت !
ومن نهارتها..ضوات قناديل الصالحين وتحلت البيبان قدام ها الزوز عاشقين وتكشفت أسرار الوليا ومعجزاتهم وشعلت السماء بأرواح المريدين وهامو الاثنين ..في منظر السما البديع وباسمهم نورت الشجرات في جناين الملوك وتفتحت أول زهرات اللوز في جنينة ربعية .
وعلى خاطر حيوط المدينة عندها وذنين وتسمع و تحفظ و تشهد وعلى خاطر المدينة هي زادا أنثى! و تعشق.هذي حكاية بلدية ،حكاية عشقة..عشقة في المدينة.