أنا ما اسميش شهرزاد أما جاية اليوم نحب نحكي وحتى كيف يطلع الفجر مانيش بش نسكت اسمعني نخرفلك :
طابة طابة و ع الجبين عصابة وعامجاي استنيتو ماحبش يجيني صابة والزهر تكب ع الفرتونة..ميسالش نصبر والصابر ينال ندي الفرض و يجي نهار وننقب الارض ونعمل فيها فلة ونخرج و نزرع الغلة وتهب الريح ومانجنيش العواصف نحرقس نحمر ندبغ و نلبس بلوطة و ساقي حفيانة ماللوطة نردس الارض نشقها وحقوقي من بين سنيك نفكها وقد مانكبر نصغار رد بالك العار أطول مالاعمار استنى يموتو كبار الحومة و بعد قول مانيش مشومة اسمعني نخرفلك : نحب نرشق في وذني مشمومة و نشطح يا ببح و نشكل ولد الجيران فوق السطح ولا نحشم لا نجعر نهبط للمحفل نتدرج و نسلب عقل المتفرج ونستناه ..يقرا و يتخرج وبعد يقعد بطال و أحلامنا ما يطلعش عليها النهار ونقعدو حيط يصد و حيط يرد و يعلموني نطيب العقد..الهرقمة و الكسكسي بالمناني و يعطيوني لاول واحد جاني ورد بالك تقول لا راك تبور و تقعد تدور و تضربك الحيوط و تتمنى الموت أما وقتها فات الفوت تظفر الشيب و يقولو عاملة العيب وتقعد كالزير المتكي وحتى حالك ماعادش يبكي..لي يعمل بيدو ربي يزيدو اسمعني نخرفلك..أنا نحب نتنفس ونقرر لي نحب و نغلط و نغفص و نرفس ..مش قتلي ضربة ايدي توجعني ما توجعكش؟؟ مالا مايهمكش أنا حرة ..ايجا ذوق معايا أيامي المرة و بعد كان قعدلك عين تكلم فلي نحبو مش مسلم..لو كان تبوس عينك وتطلع أمارة على جبينك وتحوال و تولي المسيح الدجال وتتذكر في القرآن ويقولو آيات الرحمان نقعد نحبو وسعدي بيدي نكبو ماهوش مقدود و أمو مش تحت اللحود ولا زين ولا عين ولا بنى دار على طاقين وهو قردي وغزالي وكيف نراه قلبي يلالي ونتمناه حلالي ولا نقلو صياغة بيضا ولا حمرة ..نقلو عنقني وطفي في الجمرة ننساو العالم و الناس ولا يوجع لخالي راس.. نولي ليه مداس ولا يمثلني بالشمس ولا بالقمرة..خلي يقولو سمرة و حازاتو ويرحم الام لي جاباتو وتزغرط علينا خالاتو ونكملو الطريق فرد ثنية زعمة هذا برشا علي؟ لقمة أكبر من فمي ونحوز رضا امي ..تقلي بنيتي يهنيك و يعليك على من يعاديك ونهربو ونسكرو الباب ونبات ما بين يديك والدنيا ساكتة و نجوم الليل ضواية و حكايتنا حكاية ..تلعبلي بشعري و تقلي تكلم ..تكلم و علي بالصوت و فيق لي رقدهم الموت ماعاد حد يسكتني ..انا نحبك ولا يهمني بابا يسقطني و لا الناس تمقتني ..نعبد فيك عبادة اسئل ربي كيف نحكيلو ع السجادة و تبدا ناري وقادة..وتقلي انا ابن زيدون وانت ولادة وتوشمني في ظهرك وتحكي علي لحفار قبرك وتقلو حبيت و ما قلت احيت وماعندي ورايا ما خليت..جنتي كانت هي