بشعري المشبشب إنت متعذب مالا كان نسيبو يتسبسب !!!تقول مشومة وتحوس براس مرفوع في الحومة ... إنت مولى الراي المدبدب تحبني أما باقي تكذب ..تكذب على روحك وعلي متعدي قدام داري يتسرسب .. تكذب وتقول موش كيف البنات وين يطيح الليل تبات ..تمشي برقعة صحيحة ولسان طويل وما تروح إلا ما يطيح اليل .. مالا فضيحة !!! اسمعني مالا وشد الصحيح في رايك ...أنا المشومة وموشمة في عنقي ربة الجمال ..لا يهمني جاه ولا يغريني مال ..نتعدى نردس ونعفس في إلي يسكت قبل إلي يتكلم .. نعرفك ميت فاني أما عامل بالعاني .. تتبهنس أما تتمنى تعنقني والمطر تبخنس .. تتمنى تمشي معايا وتهز راسك أعلى مني وتقول هذا فني ..تقول نعشق في للات النسا إلي ترى الشرف مهوش غطى... أما إنت تبقى ديما ساكت ومن كبار الحومة خايف ... تراني بقلب مرايف وتهز بالصوت وتقول مازالوا كبار الحومة ما ماتوش مش لازم تعمل شريفة إنت شاقة الخلا وخفيفة ... نجاوبك : إي خفيفة أما نظيفة .. نضحك بالصوت وإنت استنى الموت .. إنا نمشي وإنت إحسب خطواتي وخمم وين نبات .. ستناني وعس وين نعفس وكي يخونك لسانك ما تقولش طايشة ... طايشة تمشي وتتبختر موشمة معرية الزند والعين مكحلة وهازة الشعر للسما ... صبر روحك بكلامهم يا كبدي وانسى انك كيفي ... تحب الدنيا .. خليك كيفهم قول كلام وشوفني في المنام .. تجري معايا تصيح وتسابق في الريح ... تقلي خليني نطير و وين ترسي ترسي .. خليني نمشي وما نرجعش .. نمشي لبلاد ما فيهاش العيب أكثر م الحرام .. لبلاد نعيشو فيها ما نموتوش بالكلام .. ..