نحب نتزعبن ونعرف آش مخبي فيا..ماهم يقولو احنا زراعة إبليس .نحنا السم والكيد يجري في الدم .. أنا توا نحب نكون شيطانة ..نمشي بخفة ودلال وميهمنيش كان قالوا ملا هبال ..نحب نحني ونغني وننقش إسمي على خصري ..نشطح ونردح ونسمع للعالم رنات خلخالي .. نحب نحمر ونغبر ونقول للسهر عنقني ..نمضغ العلكة وجارتنا م الغزول على راجلها تترشق .. نحب نهز هاك الشباب بالعين ونحط وهو قدام خزراتي سايح ...ندخلو للبحر ونخرجو شايح ...
خلي يقولوا زعبانة وتحب في الحومة تحل جبانة ..نحب نهبط ندرج في الشارع نرى الرجال صفوف صفوف .. إلي يلعب في الخربقة ينسى اللعبة ويبدى يسب وينعل في الدنيا الكلبة .. الدنيا إلي خلات البنات لا حشمة لا جعرة وهو في راسو طالعة النعرة ويتمنى من ربو يرجع بيه الوقت التالي وميسالش يقول يا مالي خير ملي يقول يا حليلي ويدفن راسو في القاعة ويعيط ويقول كش مات وهو إلي في ريحة النعناع مات وفات فيه الفوت ..
خلي يقولوا زعبانة وفتانة تحوس في الشارع حفيانة وعريانة توري في زنودها للشمس وتشمم للأرض في ريحة حنتها .. وهاك الشباب يقول يا ريتني شيطان في جنتها ... ناكل م الفاكية المحرمة ونعصي ربي ومالو إلا غفور رحيم وجميل يحب الجمال ... هي نعمة ومسمينها نقمة ... نحب ربي.. نعصيه أما منكفرش بالنعمة ...
نحب نتزعبن ولي يقول خلي يقول . يشكر وإلا يذم ... نحب نجري ونسابق الطريق ونميح مع الأرياح .. ما يهمني في حد .. نضحك بالصوت لا نحشم من رجال الدار ولا نخاف م الموت ...
نحب ننسى اني أنا وننساهم هما وما نخمم كان في شيطاني ...