ما نصدق إلا ما نعنق .. نعنق الحلمة الهاربة وأنا من صغري نجري وراها .. .
ريقي شاح وساقيا حفات وهي عاملة علي بالعاني ...
نعنق الكلمة إلي تدور في راسي .تهبلني وتجنني باش تخرج تفضحني للي يسوى والي ما يسواش .. نعنق الراجل إلي نتمنى ونحس في حضنو الأمان وننسى معاه غدر الرجال وماء البحر إلي يشقلبك ألف تشقليبة قبل ما يبلعك وبعد يبصقك عايفك وكاره ريحة موتك ...
نعنق يد تلعب على شعري موش صدري وأنا نتلوى في فرشي نتوجع من ماضي مازال مامشاش ومستقبل مازال ماجاش.. نعنق سما واسعة فيها ألف سحابة هاربة ليها من أرض ردمتني فوقها .لا عطاتني ولا خلاتني نعطيها ما نصدق إلا ما نعنق هكا تعلمت .ما قلي حد .وحتى كي قالولي ما صدقتش إلا ما عنقت كلامهم ...
من صغري نلعب بالزئبق موش بالنار ..وعمري ما عنقتو.النار نعرفها تحرق نبعد عليها أما هو ما نجمتش نفارقو ..كنت ديمة نتحايل عليه أما ما نفعش .ديمة هارب كيما برشة حاجات توا .. تقولش ستانست ؟؟؟لا وما نستانسش.. تبقى لعبة نحبها ونحنلها وحتى كان كبرت عليها ومعادش لقيت زئبق عرفت إلي موش كان هو ما يتعنقش ...
كل شي حلو في ها الدنيا زئبق ما تصدقوش إلا ما تعانقو أما يا خسارة ما تنجمش هاكا علاش هو يبقى ديمة حلو كيما الزئبق في عينيا …