تكلم احكي و ما تخلي شي في قلبك مخبي انا نحبك و ما نخاف كان من ربي. احكي على فرحك خليني نتحزم نتخبل و نهبط للمحفل نتدرج و نسلب عقل المتفرج. احكي على وجيعتك خليني نلم همي و همك و نبدا نهبط فيهم حيار و نحملك و نخبيك عندي جهار في النهار. تكلم احكي و ما تخلي شي في قلبك مخبي انا نحبك و ما نخاف كان من ربي هز بالصوت و علي خليني نسمع فني, قلي نحبك و بالصوت علي, رد بالك تقول نسيت و الا سهيت تعرفني وقت تستحقني نجيك و ما عندي ورايا ما خليت أقرب حط يدك في يدي و خلينا نمشيوا ، نمشيوا في ثنايا بعيدة ما يعرفها حد كان احنا. ثنايا كلها فل و ياسمين، و وقت يليل الليل نفرشوا الأرض و نتغطاو بالڨمرة . أما نحبك لا تمثلني لا بالشمس و لا بالڨمرة. نحبك، تحبني، تعشقني، تعيش بيا و ليا و عينيك تظلام كيف تبعد حتى لحظة عليا. أنل زادة نحب نحبك، و نعيش بحبك. لا نسلم فيك و لا تسلم فيا. كي تضيق بك الدنيا، تهربلي، نقربلك، نوشوشلك و ما نخلي شي في الدنيا يمسك. أخطانا من الكلام الي تقال، خلينا نخترعوا كلام جديد، كلام يحكي حكايتنا احنا برك. كلام ما يفهموا حد كي يسمعوا، أما احنا نفهموه و نحبوه خاطرو منا و فينا. و الا نقلك موش لازم الكلام ، حط عينيك في عيني و الخزرة منك تكفيني، تنسيني، تقتلني و تحييني. ثنيتنا مازالت طويلة أما لازم نكملوها . حط ايدك في يدي و هيا أما قبل ما نبداو نوصيك وصية: كان تعبت بالبسمة قويني ، و إذا وقفت بالكلمة الحلوة واسيني ، و إذا غفيت وشوشلي و غنيلي، هز بالصوت و قلي :
"نحبك و نحبك و نحب نحبك. و نحب الناس تعرفني نحبك. و نحب حروف كلمة نحبك " خاطر أنا بالحق نحبك....